ملتقى الشعراء

ملتقى الشعراء (http://www.nazaralqatari.net/multaqaa/index.php)
-   قصائد الاحزان (http://www.nazaralqatari.net/multaqaa/forumdisplay.php?f=101)
-   -   حلم احضن گبرك (http://www.nazaralqatari.net/multaqaa/showthread.php?t=107947)

سامي الكعبي 06-08-2018 05:57 PM

حلم احضن گبرك
 
حلم احضن گبرك .. فدوه عمري العمرك
الصادق انت احلامي. وبيك تبدي ايامي
فدوه عمري العمرك
.......

يعود بيه الوگت اكتب ذكريات احزاني
ابسطر الاول ما نسيتك وانت ما تنساني
رحت انشد گلب امي اعله العشگ رباني
اتگلي جعفر هذا امامك للمجد وداني
اتمسك ابآدابه .. والطم اعله امصابه
وخلي صدرك دامي .. وبيك تبدي أيامي
فدوه عمري العمرك
..........

من تمر ذكرى المصيبه الحزن يسكن داري
المجالس لبن باقر هيه دمعي الجاري
اتصيح يمه انظر نحيبي الغيبالي انظاري
يالجنتت بالرحم تسمع كل ونين القاري
حلمي يكبر نوره .. وانتظر هالصوره
الشوفك اصبح ضامي .. وبيك تبدي ايامي
فدوه عمري العمرك
........
كبرت اوياي امنياتي يا اعز كل ناسي
يلخزنت اعلوم طاها ويلملكت احساسي
مدرسة بيت النبوه وبيك رافع راسي
امي غذتني اعله علمك وانتشر بانفاسي
نذر عمري انطيتك .. الگبرك اتعنيتك
ابگلبي گبل اجدامي .. وبيك تبدي ايامي
فدوه عمري العمرك
.......


جانت امي اتصيح يبني امروتك وديني
الجعفر الصادق ازوره وهو مذهب ديني
عهد هاك اخذه ابوصيتي بينك وما بيني
يحضر ابيوم القيامه وهو الي اينجيني
جعفريه اتباها .. الجلمه ما انساها
يالبنيت اسلامي .. وبيك تبدي ايامي
فدوه عمري العمرك
......
گمت اتنفس غيابك كل معاني احروفك
فوگ گبرك هوت روحي وگلبي ينعه ايشوفك
امطوگ ابجند النواصب ماتهمها اظروفك
ابلا يه گبه و لا مناره ولا ضريح ايطوفك
روحي تلمس روحك .. شفت ثكل اجروحك
يلحملت الأمي .. وبيك تبدي ايامي
فدوه عمري العمرك
...
طفح مجره ادموع عيني اعله الدرب متبدي
ليش ضل مسموم جبدك ريت اضحي ابجبدي
انگلبت اعيون التضدك كلها صارت ضدي
حلم يحضر للبقيع الليله كون المهدي
يوگف اعله اعتابك .. حته اشم اترابك
قائدي وصمصامي .. وبيك تبدي ايامي
فدوه عمري العمرك
.....
استشهاد الامام جعفر الصادق ع
25 شوال 1438
الحاج سامي الكعبي


الساعة الآن 12:05 AM

Powered by vBulletin® Version 3.8.9
Copyright ©2000 - 2018, Jelsoft Enterprises Ltd.
support : Bwabanoor.com


HêĽм √ 3.1 BY: ! ωαнαм ! © 2010
جميع الحقوق محفوظة لمنتديات ملتقى الشعراء - نزار القطري

Security team